Kuva tariki 17 kugera 25 Mutarama 2019 mu karere ka Musanze habereye ibyiciro bitatu by’amahugurwa agenewe abayobozi b’uturere bungirije bashinzwe iterambere ry’ubukungu ubukungu hamwe n'abayobozi ba one stop centers baturutse mu turere twose uko ari 30. Ni amahugurwa agamije kubongerera ubumenyi mu bijyanye n'imicungire n'imikoreshereze y'ubutaka no kurebera hamwe uko services z'ubutaka mu turere bakoreramo zarushaho kunozwa. Ni umwanya mwiza kandi wo kungurana ibitekerezo n’abo bayobozi ku ruhare rw’uturere n’abaturarwanda muri rusange kuri gahunda yatangiye yo kuvugurura igishushanyombonera cyo ku rwego rw’igihugu cyo muri 2011 kikajyana n’icyerekezo cy’igihugu cya 2050.

Mu ijambo rye afungura ayo mahugurwa, Umuyobozi Mukuru akaba n'Umubitsi w'Impapurompamo z'ubutaka, Madam Espérance Mukamana yasabye abayitabiriye kurushaho kumva neza akamaro k'imikoreshereze y'ubutaka no kuzirikana ingaruka bitera iyo ubutaka bukoreshejwe nabi, anabasaba gutanga ibitekerezo byubaka kandi binasubiza ibibazo dufite; ati “Ndizera ntashidikanya ko aya mahugurwa azarangira umuntu uri hano wese yumvise akamaro k’imikoreshereze myiza y’ubutaka”. Yanabibukije ko imikoranire myiza hagati y'inzego zibishinzwe ari ryo pfundo rizafasha mu guhangana n'ibibazo byose biterwa n'imikoreshereze mibi y'ubutaka.

Rutagengwa Alexis, ukuriye ishami ry’igenamigambi ry’imikoreshereze y’ubutaka, gupima no gutunganya amakarita mu kigo Gishinzwe Imicungire n’Imikoreshereze y’Ubutaka Mu Rwanda akaba yari n’umwe mu batanga ayo mahugurwa, yasobanuye uko imikoreshereze y'ubutaka ihagaze uyu munsi, ibishushanyombonera by'imijyi, imbogamizi zigaragara mu ishyirwa mu bikorwa ryabyo n'ingamba zafatwa ngo ibishushanyombonera bikurikizwe ndetse n’icyatuma ubutaka bukoreshwe icyo bwagenewe gukoreshwa. Yagize ati, “dukeneye kumva kimwe imikoreshereze y'ubutaka twese no gushyira imbaraga n'ubufatanye bw'inzego zose guhera mu igenamigambi kugeza mu ishyirwamubikorwa kugirango turusheho kubukoresha neza”.

Mu gusoza ayo mahugurwa, abayitabiriye bagaragaje ko bungukiyemo byinshi ndetse bamwe bavuga ko harimo byinshi bumvise ku nshuro ya mbere, bahamya ko umunsi basubiye mu kazi hari ibibazo bajyaga bitabaza abandi ngo babafashe kubikemura ariko ko kuva ubu bagiye kujya babyikemurira.

Manzi Théogène, Umuyobozi wungirije w’akarere ka Gatsibo ushinzwe iterambere ry’ubukungu, yashimiye ikigo cyabashije gutegura ayo mahugurwa, avuga ko ubumenyi bakuyemo buzabafasha mu gukemura ibibazo by’abaturage bajyaga bahura nabyo ndetse anasaba ko uruhare rw’ikigo Gishinzwe Imicungire y’ubutaka rwarushaho kugaragara, ati “ byaba byiza ikigo cyanyu ari cyo cyonyine giharirwa guhuza ibikorwa (coordination) by'igenamigambi ry'imikoreshereze y'ubutaka, izindi nzego zose zifite aho zihuriye n'imikoreshereze y'ubutaka zikajya zibanza kubagisha inama”.

Ayo mahugurwa y'iminsi 2 yabaye mu byiciro bitatu aho buri cyiciro cyabaga kirimo abayobozi baturutse mu turere 10. Muri ibyo byiciro byose hahuguwe abayobozi b’uturere bose bungirije bashinzwe iterambere ry’ubukungu ubukungu (30) n'abayobozi ba one stop centers bose (30) bikaba byitezwe ko ibyinshi mu bibazo byagaragara mu turere mu bijyanye na services z'imicungire n’imikoreshereze y’ubutaka bizakemuka.