Tariki 25/04/2025 abayobozi batandukanye barimo Minisitiri w'Ibidukikije Dr. Valentine Uwamariya ari kumwe n'Umunyamabanga wa Leta muri Minisiteri y'Ubuhinzi n'Ubworozi Eric Rwigamba, Guverineri w'Intara y'Iburengerazuba Ntibitura Jean Bosco, abayobozi baturutse mu bigo nka REMA, NLA, RAB, N'ibindi basuye banaganira n'aborozi bafite inzuri muri Gishwati

Bamwe mu borozi bitabiriye inana yabahuje na Minisitiri w'Ibidukikije

Impamvu yo guhura n'abo borozi yari ukubasobanurira amabwiriza ya Minisitiri w'Ibidukikije na Minisitiri w'Ubuhinzi n'Ubworozi No 001 yo ku wa 11/02/2025 agena imicungire n'imikoreshereze yihariye y'ubutaka bw'inzuri za Gishwati ndetse no gushakira hamwe ibisubizo by'ibazo bizivugwamo.

Aya mabwiriza agamije kunoza imicungire n'imikoreshereze myiza y'ubutaka bw'inzuri za Gishwati zasaranganyijwe mu Ntara y'Iburengerazuba mu turere twa Nyabihu, Rubavu, Ngororero na Rutsiro, hagamijwe gukemura ibibazo byazigaragayemo.

Ayo mabwiriza kandi agena amasezerano umworozi azagirana na Leta yo kubyaza umusaruro ubworozi no kubungabunga ubuta bw'urwuri mbere y'uko ahabwa icyangombwa cy'ubutaka cy'urwuri gikosoye.

Guverineri w’Intara y’inzuri yagaragaje akamaro k’izo nzuri ku bukungu bw’iyo ntara za Gishwati aho yagaragaje ko ari igice cy’ingenzi cy’ubutaka cyifashishwa mu bworozi ndetse kikanagira uruhare mu kurengera ibidukikije no gutanga umusaruro mu bukungu bw’uturere twegereye ishyamba rya Gishwati, anagaragaza ko zidacunzwe neza zitatanga umusaruro ziba zitegerejweho.

Yagize ati “hari ibibazo bibangamiye imicungire myiza y’izo nzuri birimo imikoreshereze yazo itanoze, kutagira igenamigambi rirambye rizibereye, ibibazo by’amazi n’imihanda bituma umukamo utagera ku gihe aho ugomba kuba ugeze”, asaba ko iyo nama n’aborozi yaba umwanya  mwiza wo gusobanukirwa amabwiriza yihariye agena imicungire n’imikoreshereze y’izo nzuri, no guhuriza hamwe imbaraga mu gukemura ibyo bibazo byose byagaragaye.

Mu ijambo rye, Minisitiri w’Ibidukikije yagarutse ku mateka y’izo nzuri kuva mbere ya 1994 kugera mu 2007 aho hashyirwagaho komite yasuzumiga ibibazo byari bizirimo icyo gihe agaragaza ko kuva zasaranganywa zakomeje kugaragaramo ibibazo bitandukanye ariko ko Igihe kigeze ngo byo se bikemuke ku bufatanye bw’aborozi n’inzego zose bireba bityo zikabasha kongera umusaruro. 

Yagize ati, “umworozi agomba kugirana na leta amasezerano agaragaza ibyo asabwa kubahiriza mu rwego rwo kuzamura umusaruro ndetse no kubungabunga ubutaka bw’urwuri”

Uhereye ibumoso:Umunyamabanga wa Leta muri Minisiteri y'Ubuhinzi n'Ubworozi Eric Rwigamba, Minisitiri w'Ibidukikije Dr. Valentine Uwamariya,Guverineri w'Intara y'Iburengerazuba Ntibitura Jean Bosco

Yanashimiye kandi inzego zose zagize uruhare mu gukemura ibibazo byagaragaye mu nzuri za Gishwati ndetse n’aborozi ku bw’ubushake bwabo bwo kubyaza umusaruro mwiza izo nzuri

Ibibazo by'ingenzi bigaragara muri izo nzuri harimo iby'aborozi bafite ubuso bunini cyangwa butoya ugereranyije n'ubuso buteganywa kuko mu isaranganya ryabaye muri 2007-2008 umuntu ku giti yahabwaga hegitari 5 naho ishyirahamwe rigahabwa hegitari 10, abafashe ibishanga bakabikamya bakabihindura inzuri ndetse n'abigabije ubutaka bwa Leta nk'ibisigara ndetse n'amashyamba, amabuga n'inzira by'inka byose bakabyibaruzaho kandi atari ibyabo.