Tariki ya 13/09/2018 mu cyumba cy’inama cy’akarere ka Rubavu hateraniye inama yari iyobowe n’Umuyobozi w’intara y’Iburengerazuba, Bwana Alphonse MUNYENTWARI, yari igamije kurebera hamwe no kunoza ibijyanye n'imikoreshereze n'imicungire y'ubutaka muri iyo ntara.

Mu ijambo rye afungura iyo nama, Umuyobozi w’Intara akaba yashimiye buri wese wayitabiriye anasaba abitabiriye kuvugisha ukuri no gutanga ibitekerezo byiza byatuma akazi karushaho kugenda neza.

Ni inama yari yitabiriwe n’Umuyobozi w’Intara y’Iburengerazuba, Umuyobozi Mukuru w’Ikigo Gishinzwe Imicungire n’Imikoreshereze y’Ubutaka mu Rwanda (RLMUA), Umuyobozi w’akarere ka Rubavu, Abayobozi bungirije bashinzwe ubukungu b’uturere twose tugize Intara y’Iburengerazuba, Umuyobozi w’Ingabo na Police mu  Intara y’Iburengerazuba, Abayobozi ba one stop centers zose zo mu turere tugize Intara y’iburengerazuba ikaba yaribanze ku mitangire ya services z’ubutaka mu turere turindwi (Karongi, Rubavu, Rusizi, Rutsiro, Ngororero, Nyamasheke, Nyabihu) tugize iyo ntara aho usanga tumwe na tumwe muri utwo turere dutanga services zitanoze ku buryo abazikenera bahora bijujutira ubuyobozi kutabitaho.

Umuyobozi Mukuru w’Ikigo Gishinzwe Imicungire n’Imikoreshereze y’Ubutaka mu Rwanda, Mme Mukamana Esperance abwira abitabiriye iyo nama yagize ati, “dutanga services dute, twakira abatugana dute? Nitumara kwisubiza nibwo tumenya neza niba koko duhaza ibyifuzo by’abatugana”. Yagaragaje kandi ko kudatanga services nziza byajya bibazwa ba nyir’ukubikora kuko hashyizweho uburyo ndetse n’igihe service runaka igomba kumara; yagize ati “hakozwe client charter igaragaza igihe ntarengwa dossier igomba kumara kugirango ibe yarangiye, iyo client charter ikaba igomba kuba imanitse ku mirenge yose (n’ubwo hari bamwe batayimanitse) ku buryo umuturage utabonye service ku gihe afite uburenganzira bwo kubaza impamvu”.

Mu bibazo by’ingenzi, nk’uko byagarutsweho n’abitabiriye, bituma services zitagenda neza harimo ikibazo cy’abakozi bashinzwe ubutaka mu mirenge bakoreshwa akazi kenshi ndetse rimwe na rimwe kanyuranye n’inshingano zabo, hakabamo kandi n’ikibazo cy’umubare w’abakozi bakeya muri za one stop centers ugereranyije n’uko bakagombye kuba bangana. Kuri ibyo bibazo byombi abayobozi mu turere bagiriwe inama yo kwicara bakikorera isuzuma bakareba niba koko buri mukozi akora ibyo ashinzwe ku gihe, bakanareba niba umubare w’abakozi bafite hari ingaruka mbi ugira ku mitangire ya serivces inoze.

Mu bindi bibazo byagarutsweho ndetse bikanatindwaho ni ikibazo cyo guhindura no kutubahiriza ishyirwa mu bikorwa ry’ibishyushanyombonera. Mu bibazo by’ingenzi byagaragaye ingero ni nk’ibishushanyombonera by’imikoreshereze y’ubutaka bitanoze cyangwa bigonganira mu duce tumwe na tumwe, ibishushanyo  y’imijyi bifata ubutaka bunini burenze cyane imbibi z’ubwari buteganyijwe mu Gishushanyombonera cyo ku rwego rw’igihugu; Impushya z’ubwubatsi zitangwa bitajyanye n’ibiteganyijwe, zikanatangwa hanze ya master plan,…

Abari mu nama bemeje ko mu gihe habayeho guhindura (update) ibishushanyombonera byajya bimenyekana ku nzego bireba hagahuzwa amakuru ku rwego rw’igihugu, ibi bikaba inshingano za njyanama y’akarere. Kuri ubu kandi igishushanyombonera cy’igihugu ndetse n’icy’Umujyi wa Kigali bibaba byaratangiye kuvugururwa bikaba binateganyijwe ko hazakorwa n’iby’imijyi itandatu yunganira umujyi wa Kigali ariyo Muhanga, Huye, Nyagatare, Rusizi, Rubavu na Musanze.